Նոր շունչ ԵՊՀ Իզմիրլյան գրադարանում

Իզմիրլյան հիմնադրամի կողմից Հայաստանում իրականացված առաջին խոշոր նախաձեռնություններից էր Երևանի պետական համալսարանի գրադարանի տեխնիկական և բովանդակային արդիականացման ծրագիրը։ 1996 թվականին հիմնադրամը զգալի դեր ունեցավ գրադարանի շենքի վերակառուցման և տեխնիկական վերազինման գործում, որը հետագայում կոչվեց Սարկիս և Մարի Իզմիրլյանների անունով։

Իզմիրլյան հիմնադրամի հետևողական աջակցության և կրթության ու գիտության զարգացման գործում ունեցած ներդրման շնորհիվ Գրքի նվիրման օրը նշանավորվեց ԵՊՀ Սարկիս և Մարի Իզմիրլյանների անվան գրադարանի ամբողջովին վերանորոգված առաջին հարկի վերաբացմամբ։ Նորարարական լուծումներով և թարմացված գործառական հայեցակարգով վերաձևավորված սրահն այժմ կրում է Հայաստանի ազգային հերոս Դիկրան Իզմիրլյանի անունը։

Հիմնանորոգման շրջանակում գրադարանի ենթակառուցվածքները համալիր բարելավվել են։ Վերակառուցվել է առաջին հարկի մուտքի սրահը, արդիականացվել են լուսավորության և օդափոխության համակարգերը, տեղադրվել է ժամանակակից ապակե տանիք։

Իր նորարարական և ոգեշնչող միջավայրով գրադարանը համալսարանական համայնքին կծառայի որպես գիտելիքի ստեղծման և նորարարական գաղափարների զարգացման հարթակ՝ նպաստելով ակադեմիական ու գիտական ներուժի լիարժեք բացահայտմանը։