Հիմնադիր
Դիկրան Սարկիս Իզմիրլյանը հաջողակ միջազգային ներդրող և բարերար էր։ Ավելի քան 75 տարի նա Իզմիրլյան ընտանեկան բիզնեսի կառուցման և աճի շարժիչ ուժն էր․ այդ բիզնեսի սկիզբը դրվել է 1902 թվականին Սուդանում։ Պարոն Իզմիրլյանը հաջողությամբ ստեղծել է բիզնեսների լայն խումբ ապրանքային առևտրի, արտադրության և ֆինանսական շուկաների ոլորտներում, ինչպես նաև զգալի անշարժ գույք աշխարհի տարբեր երկրներում։
Ի պատիվ իր ծնողների և իր ժառանգության՝ պարոն Իզմիրլյանը Հայաստանում հիմնադրել է Իզմիրլյան հիմնադրամը՝ մի պարզ նպատակով՝ «նպաստել ազգի պահպանմանը»։ Հայաստանում իր մոտ 30-ամյա գործունեության ընթացքում Իզմիրլյան հիմնադրամը բազմազան նախաձեռնություններ է իրականացրել կրթության, առողջապահության, զբոսաշրջության և տնտեսական զարգացման ոլորտներում։ Նրա առատաձեռնության շնորհիվ Իզմիրլյան հիմնադրամն օգնել է տասնյակ հազարավոր հայերի։
Նա արժանացել է Հայաստանի Հանրապետության բարձրագույն՝ Ազգային հերոսի կոչմանը և «Հայրենիք» մեդալին, ինչպես նաև Հայ Առաքելական Սուրբ Եկեղեցու բարձրագույն՝ «Սուրբ Էջմիածնի ասպետ» շքանշանին։
«Դիկրան Իզմիրլյանը բացառիկ անհատականություն էր՝ օժտված ազնվությամբ ու համեստությամբ, բարությամբ և ծառայելու պատրաստակամությամբ։ Նա աչքի էր ընկնում իր խորը գիտելիքներով ու փորձով և անսասան սիրով իր ժողովրդի ու Եկեղեցու հանդեպ։ Նա ննջեց ի Տեր՝ թողնելով անձնվեր ծառայության հիշարժան ժառանգություն։» — Նրա մահվան կապակցությամբ՝ Գարեգին Բ Ծայրագույն Պատրիարք և Ամենայն Հայոց Կաթողիկոս
«Հայաստանի անկախացումից ի վեր Դիկրան Իզմիրլյանը իր նախաձեռնություններով Հայաստանի Հանրապետության հանդեպ սիրո դրսևորման վառ օրինակ է եղել» — Հայաստանի վարչապետ։ «Մեծ բարերարի գործունեությունը Հայաստանի Հանրապետության հանդեպ սիրո միանշանակ դրսևորում էր, որի համար նա արժանիորեն ստացավ մեր պետության Ազգային հերոսի կոչումը, ինչպես նաև բազմաթիվ բարձր պետական պարգևներ և, իհարկե, մեր ժողովրդի երախտագիտությունն ու հարգանքը։ Դիկրան Իզմիրլյանի հիշատակը միշտ կապրի հայ ժողովրդի սրտում։» — Նախագահը, ով պարոն Իզմիրլյանին բնութագրեց որպես «հայ ժողովրդի արժանավոր զավակ»