Գիշերօթիկ կրթություն սահմանամերձ համայնքների և Արցախից տեղահանված աշակերտների համար

Ամփոփում

Ծրագիրը մեկնարկել է Հայաստանի սահմանամերձ համայնքների աշակերտների համար որակյալ ավագ դպրոցական կրթության հասանելիությունն ընդլայնելու նպատակով՝ գիտակցելով կրթության կարևորությունն այդ համայնքների դիմակայունության և երկարաժամկետ զարգացման համար։ Շիրակացի ճեմարանի հետ համագործակցությամբ իրականացվող նախաձեռնությունը սոցիալապես խոցելի ընտանիքների աշակերտներին տրամադրում է գիշերօթիկ կրթության հնարավորություն՝ թույլ տալով նրանց օգտվել բարձրորակ ուսումնական միջավայրից։

Արցախի հայ բնակչության բռնի տեղահանումից հետո ծրագիրն ընդլայնել է իր շրջանակը՝ աջակցելու Արցախի Շիրակացի ճեմարանի սաներին և նպաստելու Հայաստանում նրանց կրթության շարունակականությանը։

Այսպիսով, ծրագիրը միավորում է հեռավոր և սահմանամերձ համայնքների աշակերտներին և Արցախից բռնի տեղահանված սաներին տրամադրվող աջակցությունը՝ ապահովելով որակյալ կրթության հասանելիություն և նրանց ակադեմիական ու անձնային զարգացման հնարավորություններ։

Ծրագրի նպատակն է Հայաստանի սահմանամերձ համայնքների սոցիալապես խոցելի ընտանիքների աշակերտներին տրամադրել որակյալ ավագ դպրոցական կրթության հասանելիություն և անձնային ու կրթական զարգացման նոր հնարավորություններ։ Աջակցելով նրանց կրթությանը Շիրակացի ճեմարանում՝ ծրագիրը նպատակ ունի կրթել և դաստիարակել երիտասարդներ, որոնք կարող են դառնալ դրական փոփոխությունների նախաձեռնողներ, իրենց գիտեկիքներով օգտակար լինել իրենց համայնքներին ու հասակակիցներին և աջակցել Հայաստանի հեռավոր համայնքների երկարաժամկետ զարգացմանը։

Հեռավոր սահմանամերձ համայնքներից և Արցախից ութ տաղանդավոր ավագ դպրոցական հնարավորություն ունի սովորելու Շիրակացի ճեմարանում։